torsdag 18. desember 2008

Gratulerer HP med 18-års dagen i går!




I går kveld var det tradisjonell bursdagsfeiring på Os med besteforeldre, tanter/onklar og syskjenborn. Bildet er av ei ung gudmor, LilleMø, og dåpsbarnet. HP er blitt ein høg, sterk, kjekk ung mann med den gode replikken - lik både farfar og morfar. Godt for besteforeldra å få hjelp til tunge tak.

søndag 7. desember 2008

Bursdagsfeiring i Eidsgt.




I og med at vi feira stort i Torvika i går, vart selskapet til Roger utsett til i dag. LilleMø hadde svigerfar på søndagsmiddag og vi andre i familien kom til kaffi. Eg hadde steikt dia-lappar (vi er minst 3 som må vere forsiktige med sukkeret), Strikkemor hadde med sjokoladekake og LM hadde laga kvæfjordkake, brownes og dia-gele. Ei triveleg stund, kjekt så lenge syskjenborna kan vere i lag. Etter kvart vil dei nok reise vekk på skule og jobb, så ein får setje pris på denne tida. Hestejentene var i stallen både før og etter selskapet, men fekk tid til å gje papsen sin ein bursdagklem. Damene i selskapet vart fotografert i den nostalgiske kroken. Søster Mariann var i Stavanger og feira sonen sin 30-års dag.

lørdag 6. desember 2008

Gratulerer!

No laurdag feirar svigerinna mi 60-årsdagen sin i Torvika. Bror min har nett fylt 65 år. Vi gled oss til å feire dagen i lag med dei, borna, vennene deira og syskjena mine. Måleriet er ein kopi måla av Besten frå originalmåleriet til Anders Orheim frå 1920-talet.

I morgon feirar også svigersonen vår, Roger, 47 år. Han er gift med eldste døtra vår og dei har 3 store, kjekke born, ein golden retriver + 2 hestar.

tirsdag 2. desember 2008

Bakedag

Bakedag i går, kransekaker og Ingers rugbrød. Måndag er ein fin bakedag, har som oftast ikkje andre "avtaler" då. Hadde tinging på nokre kransekaker til jul, så det vart 72 ringar, dvs. 4 kaker. Tek gjerne imot tips frå kokkene på Sunnmøre på kva eg skal bruke dei 12 eggeplommene til som eg har frose ned. Har investert i nye former, burde vore gjort for lenge sidan, lettvint med slippbelegg. Dei gamle formene må vere frå 70-talet, hugsar ikkje kor tid eg byrja med kransekakebaking, men konfirmasjonane her starta i 1980. Kakene frys eg ned, då blir dei mjuke og gode å bite i. Før i tida la dei ein brødskalk i kakeboksen for å få dei mjuke. Må vel steike nokre krumkaker også, det er nesten tradisjon i vår familie, etter farmor si tid - ho stod føre julebaksten då ungane var små - SI er alt byrja å snakke "framonde". Kakemenn og slike ting får dei kose seg med å lage i kvar sine heimar, artig for dei minste. Besten er flink å fullføre UFOane sine. Målinga er fin trening for den skada armen, tykkjer han, i og med at han no er slutta med fysioterapi. Godt det går så bra med han, i fjor vinter vart målinga spolert på grunn av at han hadde skada seg.

mandag 1. desember 2008

Advent

I går kveld var eg med LilleMø til lysmesse i kyrkja. Stemningsfull og fin stund. Konfirmantane deltok aktivt i gudstenesta med prosesjon, levande lys og tekstlesing. Eldstejenta til LM og fetteren frå Myklebuståsen, deltok i tekstlesinga saman med fleire andre konfirmantar.
Laurdag ettermiddag hadde vi uventa besøk av Lappetausa med familie. Ho hadde med ferdig middag, svineribbe med tilbehør. Dei skulle til Måløy der eldstejenta er, men fekk trøbbel med bilen, så dei møttest her i staden. Koseleg. Begge jentene hennar er vekke på skule dette året, så det var artig å treffe dei igjen. Vi fekk også middag, uventa og godt, for eg hadde tenkt å lage laurdags-graut. Strikkemor og -far med dei to minste kom til kaffi, så det vart litt sying, strikking, latter og prating utover kvelden. Mange var innom oss på laurdag, fyrst LM og hennar firbeinte venn, Viktor, så ein veteran-venn av Besten om nyleg er hjarteoperert, så SI, M og K frå Golvsengane. Søndagen var ein heller roleg dag, berre ein liten trimtur med broddar.
I dag blir det kransekake-baking i stor stil på meg, har lova bort eit par kaker til jul. Mandagane er Besten på jobb, så det høver godt. God veke!

lørdag 22. november 2008

Vinter

I dag vakna vi av snøplogen som fylte innkøyrsla vår med hardpakka snø. I og med at vi og dei fleste eigedomane har gjerde mot vegen, og vi har ei ganske breid innkøyrsle, er vi plaga med dette. Vi måtte til med handemakt for å få vekk snøen, snøfresaren klarte ikkje denne utfordringa, der snøen ligg laus, funka fresaren fint, men dette vart for tøft. Kjekt med snøfresar, men ein bør køyre den etter kvart som snøen kjem, og det kan no bli nokre turar for dag viss det snør jamnt. Av ymse grunnar vart ikkje dette gjort denne gongen og det straffa seg. Fint å vere ute i dag, fekk trimme for fleire dagar. I mørkninga var eg ute i hagen med vesleguten og veslejenta og laga snøhole. No har vi veslejenta på overnatting og det har roa seg i leiren. TV-kvelden startar med "Kvitt eller dobbelt" og "Hjarte på rette staden". God helg!

mandag 17. november 2008

Nyinvestering



I dag monterte Ole Ivar Brekke i Brekke Energi og Kraft varmepumpe i "spisestova" vår. Han er kjend for å vere flink, har aner frå Heggjabygda! Det skal bli godt å få litt stabil varme i huset og heller spe på med vedfyring når det trengs. I og med at det er oppvarming vi treng varmepumpa til, anbefalte han oss å montere den lavt, ho vart derfor plassert under vinduet. Vi kan regulere varmen til TV-stova og kjøkkenet ved å ha åpne eller stengde glassdører.

fredag 7. november 2008

Hyttetur

I dag hadde vi oss ein fin tur ut til havet, hadde sjekka véret på yr.no. Tok ferga over til Isane i ti-tida. Det vart berre finare og mildare til lenger utover vi kom, vakker sol og roleg hav. Alt stod bra til med hytta trass i sterk storm, regn og kulde i okt. Vi snakka litt med Bjarne som fortalde at det hadde vore eit fæla vér. Var ein tur i Kalvågen og kjøpte frossen lettsalta torsk i 5 kg kartongar til frysaren, billegare enn i fiskedisken på Mega og god kvalitet.
Hadde oss eit herremåltid då vi kom heim att. Bildet viser frostskodda i Isefjorden med Gjegnen i bakgrunnen, teke med mobilkamera gjennom bilvindauget då vi kom innom Kjølsdalen. Uff og uff! Eg gløymde sjølvsagt kameraet denne gongen også - får skulde på alderen.

tirsdag 4. november 2008

November

I dag er det fint haustver etter mykje regn, vind og kulde i fleire veker. I forrige veke rydda vi litt i hagen og dekka til rosene. Fire roseknoppar såg ut til å ha overlevd kulden, så eg tok dei inn. Er spent på om dei vil folde seg meir ut enn vist på bildet. Besten tok seg ein tur på sjøen i dag og eg puslar litt i huset. Eg skal ha to "nattevakter" hjå veslejenta - far har tre nattevakter på rad og mor har innspurten (siste veka) i Førde. Start på garasjebygginga hjå sonen i går, ikkje lenge gjort å få støypt grunnmuren for fagfolk. Dagane fyk av garde, sjølv for pensjonistar, men aktiviteten er heller ikkje så stor som hjå den yngre generasjonen. Ynskjer alle ei god veke.

søndag 19. oktober 2008

Søndagstur

I dag hadde Besten og Kristoffer køyre-time, lenge sidan sist. Til slutt vart eg invitert med dei på køyretur til Stigedalen. Veret var så lagleg at vi tok oss ein rask spasertur inn til Sagesætra.
Møtte LillleMø, gubben og Viktor som hadde gått heilt til Movatnet. Ser på yr.no at det blir mykje dårleg vér i veka som kjem, så det var bra at vi kom oss ut ein tur i dag. Bildet viser Bakkesætervatnet frå vestsida. Hadde ikkje med kamera, måtte derfor bruke mobilen, så det vart litt "malerisk". Besten fortel at det var ved denne gamle furua dei festa båten når han og faren skulle hente ryggsekkar og utstyr når dei var på fisketur innover dalen. Dei fekk låne ei hytte i austenden av vatnet og kunne vere der eit par tre dagar i slengen. Vatnet har grodd mykje til med siv sidan den tid, men fisken "hoppa" også dag.

lørdag 11. oktober 2008

Gratulerer!

Svein Kåre og Maleenee gifter seg i dag i Oslo.
Anne og Svein reiste til bryllaupet i går, dei kosar seg nok
i lag med barnebarnet, vesle Anne Johanne som snart er 2 år.
Gratulerer med dagen frå heile storfamilien på N.eid.

onsdag 8. oktober 2008

Vinter-ved

Haustferie (potete-ferie kalla vi det før - då ungane måtte arbeide når dei hadde fri frå skulen) betyr at Besten får hjelp til å få vinterveden i hus. I år er det Øyvind og Kvh.papen som hjelper til. Fire turar til Rognes ved Hornindalsvatnet - 4 mål ved - 2 turar i dag og 2 i morgon. Besten er litt usikker på om raude-jeepen klarer turen endå, må køyrast inn etter motoroverhalinga. Med den og hengar hadde dei klart det med 2 turar. Godt å ha minst eitt mål ved i reserve! Vi lagrar veden til LilleMø også, for dei har ikkje lagerplass anna enn til sko! Besten har ein god gamal arbeidskollega som har framifrå ved. Kjekt å treffast ein gong i året og mimre om gamle dagar. Med så mange strame gutar i familien burde vi sjølvsagt fått oss ein skogateig, men det får vi ta litt etter kvart. Fyrst må Kvernhuspapen bli ferdig med garasjen sin. Min vesle andel i dette er sjølvsagt matservering, men utan mat og drikke........

Operette

Bildet er av hovedrolleinnehaver, tenor Kjell Magnus Sandve v/Den norske Opera og lokalt gutekor (10 - 13 år). Eit artig innslag, les meir i Fjordabladet/Eidaportalen.

I går kveld var eg og såg generalprøva på operetta "Hertuginna av Chicago". Skandinaviapremiere ved Opera Nordfjord! Var så heldig å få "gratis"billett av Strikkefar. Kort tid å bestemme seg på, så eg måtte gå åleine. Uhøgtideleg og koseleg, artistane var i kostyme og alt var nesten som på ordinær framsyning. Vakker og lett musikk, kjende operasongarar, lokalt kor og artistar, vakre lettkledde danserinner. Ein måtte berre bli i godt humør. Kan anbefalast.

tirsdag 30. september 2008

Tur til Førde

Som de ser har eg endra bloggen min frå vår- til haust-fargar. Headingen er utsikt frå hytta vår. I går var eg til Førde på Mammografi. Besten hadde ikkje høve til å vere med, skal vere vikarlærar 2 dg. i veka på EVG, men eg hadde kjekt reisefølgje av Strikkemor og veslegut. Vi var innom Biltema, SparKjøp og handelshusa i sentrum. Utruleg mykje varer å sjå på. Kjøpte bl.a. ei salatslynge som eg har ønska meg ei stund. Vi kosa oss med biffsnadder på Napoleon, men angra litt då dama ved nabobordet kjøpte torsk m/tilbehør. Kan anbefale denne kafeen i 3dje etg. v/gangbrua. Vi tok ein svipp bort til Lappetausa på heimvegen. Ho venta oss med kaffi og vafler. Lappefar hadde lagt i omnen så vi hadde ei "uneleg" stund.
Bildet er frå Byrkjelo, like før Våtedalen. Snø på toppane - eit sikkert haustteikn.

tirsdag 23. september 2008

Englands-turen

Denne Citroin varebilen var Besten begeistra for.
New Forest tatt gjennom bussvinduet.

Slottet i Beaulieu. Besten sit bak "the litter".

The Round Table er hengt opp på veggen.

Skilt på husveggen i Winchester (ligg nær katedralen).

Litt av badestranda i området, fleire mil lang.

Vår gode ven, Frode (v) hadde laga presang til reiseleiar Martin (m) og sjåfør Sigurd (h).

Vi hadde ein kjekk tur og var heldige med veret, stille både på danske- og englandsbåten. Turen starta onsdag morgon den 10 sept. og vi var framme på hotellet i Bournemouth fredag kveld, så det var ei lang reise både fram og tilbake - høveleg for pensjonistar! Det var imponerande å køyre over Storebelt-brua i Danmark. Vi stoppa og hadde lunsj i Odense, ein koseleg by.

Både laurdag og søndag morgon var det tidleg opp for nydeleg engelsk frukost, turbussen gjekk kl 09 til Beaulieu-marknaden, ca 1 t. , køyrde gjennom New Forest. Dette området er verna, vart tømt for eikeskog til bygging av krigsskip for bl.a. lord Nelson. Vakkert terreng der hestar og kveg går fritt. Hestane blir også selde til Norge. Beaulieu-marknaden er ei historie for seg som går føre seg kvar haust i sept. Då stiller Lord Montagu ein del av markene sine til disp. for ca. 2.000 salgsbuder for deler m.m. og fleire hundre veteranbilar for sal. På området er det eit veteranbilmuseum som Lorden eig + kafé og butikk for sal av suvenirar m.v. Han og fam bur i eit gamalt slott m/stor kjøkkenhage for blomar og grønnsaker og like ved ligg landsbyen som høyrer til slottet. Der er også eit gamalt kloster/kyrkje. Deler av slottet + hagen, klosteret og byen er tilgjengeleg for publikum. Måndag var det busstur til Corfu Castle, ein gamal by m/borg - og til Winchester. Vi har vore på begge stadane før, likevel kjekt å oppleve på nytt.

Winchester er ein fin by med gamal historie, Great Hall & Round Table, The Cathedral der bl.a. Jane Austen er gravlagd, kloster og mange museum, kunne nok vore der nokre dagar.

Tysdag var fridag for sjåføren, då såg vi oss rundt i nærområdet/sentrum og badestranda der det ligg ein koseleg pub med god mat og drikke. Gangsti opp til West B. der hotella våre låg.

Onsdag morgon starta heimturen. I Danmark reiste vi gjennom Jylland til Ålborg og overnatta der. Fin hurtigbåt frå Hirtshals til Larvik og bussen til Drammen. Heimturen med eigen bil starta i sjutida om kvelden og vi var heime halv to om natta. Vi brukte min Mondeo til Drammen, og vår gode ven Per, køyrde begge vegane. Det var bra, for Besten har "hangla" litt med ei lei forkjøling.

lørdag 20. september 2008

Home again!



Etter 10 dagars Englandstur, kom vi heim att i natt med Lote-ferga kl 01.00. I og med at vi reiste med privatbil til Drammen, buss til Oslo, danskebåten til København, buss til Esbjerg, båt/ferge til Harwich t/r, buss til Bournemouth/Beaulieu-markedet, buss til Ålborg og Hirtzhals, båt/ferge til Larvik osv. + div. bussturar i England, vart det mykje meir enn ein Englandstur for oss. Her er foto av B+B hotellet vårt i Bournemouth der vi var i 5 netter. Vi har budd der ein gong før. Rommet (dei to vindauga i 2. etg. på bildet) var knøttlite med god dobbelseng, vask, dusjkabinett (toilett på gangen). God engelsk frukost kvar dag. Vi var på farten heile dagane/kveldane, så det hadde ikkje betydning at rommet var lite. Reisefølget på 42 med guide og sjåfør, var fordelt på 4 slike små hotell i nærområdet. Verten vår har ein skada fot (også sist vi var der), men han ordna opp med servering og vitsar/historier til frukostgjestane sine. Meir frå turen seinare.

søndag 7. september 2008

Fin haust-søndag


I dag har vi hatt veslejenta her, ho er litt småsjuk og foreldra tok seg ein litt lang fjelltur.
Først var vi i Korsen hjå Ivar Os og såg på stallen til hestane til dei to andre jentene vi er besteforeldre til. Dei møkka og stod i før dei tok seg ein ridetur til Vårsætra. Køyrestemne på Hestesenteret denne helga, så vi fekk sjå mange fine hestar. Etterpå henta vi kaninene til veslejenta ned til oss - vesleguten frå Os kom også - så i dag har vi hatt "full uttelling". No er det berre to dagar til vi skal på Englands-tur, så det var kjekt å vere i lag ei stund.

torsdag 4. september 2008

Litt av kvart


Hadde besøk av Lappetausa i går - og ho var så imponert over den fine orkidéen som vi fekk med Ørstabesta/besten sist dei var her, at eg fekk lyst å ta eit bilde. Planten står ikkje på golvet til vanleg, måtte ha ein ryddig bakgrunn. Ho var også betatt av 70-tals voksduken på kjøkkenbordet som eg nyleg fekk med Strikkemor då ho hadde funne ut at den ikkje passa i hennar kjøkken!

onsdag 3. september 2008

Gratulerer Kristine!

Bursdagsfeiring på Golvsengane
i ettermiddag med mange gjestar
og mykje god mat.
Veslejenta er blitt stor 3dje-klassing
og er 8 år i dag.
Humorfylt, aktiv, sporty jente som
held heile familien i ånde.
Med tre eldre brødre har ho tidleg
lært å "hevde sin rett".
Ho er glad i dyr, har fått seg to kaniner
i sommar, er også interessert i hest og
har vore ein del på Evas Ridesenter på
kurs i lag med venninner.
Kjekt å leike med kattungane til
Henning og børste hunden Viktor når
han er her på besøk.

søndag 31. august 2008

Mamma Mia

I går kveld var det ekstraframsyning av filmen Mamma Mia. Kristine hadde høyrt av ei jamaldra venninne at filmen var "kjempegod". Far/mor hadde ikkje høve å følgje henne, så då vart det til at eg let meg overtale. Besten hadde ikkje lyst på kino, ville heller mekke i garasjen. Det vart ei interessant oppleving, flott ABBA-musikk, flott filming, og til tider morosam, men etter mi meining noko hektisk med høgt lydnivå. Slik er det - ein merkar alderen. Føler heller ikkje at det var nokon barnefilm. Damer i panikkalderen som "slær ut håret" er vel ikkje akkurat noko underhaldning for småjenter? Då eg har sett skodespelarane i betre filmar/TV-seriar, vart eg litt skuffa. Filmen "flyt" nok på kjende skodespelarar og god ABBA-musikk. Men kanskje det er ein slik film som ein berre MÅ sjå? Det blir vel til at eg kjøper DVD-en når den kjem og ser filmen i lag med Besten!

søndag 24. august 2008

Frukthausting

Fekk lyst å skrive litt på bloggen, men har lite å skilte med for tida. Vi har mange frukttre i hagen, men vi driv ikkje med sprøyting og den slags, altså blir det økologisk. No er vi godt i gong med plomesesongen, det kan nok bli litt i meste laget! Det som imponerer (og bekymrer) meg mest er det store pæretreet. Etter at orkanen i 1991 halverte treet, fekk det likevel ein sjanse til, og vaks seg stort og fint. Tidlegare år har det bore lite frukt, men i år ser det ut til å bli både mange pærer av bra kvalitet. Så viss nokon likar pærer, er det berre å kome og plukke når det lid ut i september.

torsdag 21. august 2008

Gratulerer Helene!

Gratulerer Helene med 13-års dagen i dag. Stor og flink ten-åring med mange talent, for tida er det visst hest og matlaging som er i skuddet. Ungdomsskule-elev er du også blitt.
Det blir vel feiring i helga på tradisjonelt vis?

tirsdag 19. august 2008

Sunnfjordtur


I dag hadde eg time hjå augespesialist i Florø. Fin tur over Isane, Ålfotedalen og Svelgen. Kontrollen gjekk greitt og vi reiste vidare innover til Førde. Der var vi bl.a. på Biltema og på kafé. Fin tur langs Jølstravatnet, stoppa på rasteplassen Svidalsneset, stor fin plass med toilett og badestrand. Må trene meg litt med fotoapparatet, tok bilde mot Skei.
Lappetausa var opptatt i dag, så vi stoppa ikkje på Sandane.

mandag 18. august 2008

Nytt kamera

Besten har fått slik tru på meg som fotograf etter at eg nyleg fekk "antatt" eit bilde i Fjordabladet, så det vart kjøpt nytt kamera på laurdag. Sommartilbud på Canon digital IXUS 95015, heilt enkelt kamera med stor LCD-skjerm og søkjar, slik at det skal vere enkelt å ta bilde, sjølv for "svaksynte". Eg merkar at eg treng meir tid på å setje meg inn i nye ting, så det var greit å kjøpe kameraet før Englands-turen. Besten har eit ganske godt kamera, men det er for stort å drage på. Her er ein liten smakebit frå godstolen på verandaen.
Laurdag var vi også innom Gamlebanken og såg på jubileumsutstillinga til Øyvind Botn (80 år i morgon, syskjenbarn av far, bor i barndomsheimen til farmora mi). Vi snakka både med han og kona Elisabeth som også er kunstnar - spesielt skulpturar.

søndag 17. august 2008

Gratulerer Stig André med 18 årsdagen i går!

Stor dag i går - nydeleg haustver - Stig hadde bursdag - han og fam. hans kom heim frå ferieturen Kreta-Vigra. Med god hjelp av LilleMø og Helene var fire store pizza klar i Alleen
då dei kom heim litt før kl 21 i går kveld. Alle var samla, koseleg kveld.

torsdag 14. august 2008

På gjengrodde stier.....

Kyrkja i Heggjabygda

Flatene på Åsebøstø, huset var opprinneleg ei røykstove.

I dag var det høveleg ver for biltur - så etter kaffien på Eldretunet, tok vi med mor mi på køyretur. Ho likar godt å bile og når Besten er sjåfør er det topp! "Eg har tenkt so på Heggjabygda i dag..." sa ho - og dermed gjekk turen opp dit. Lenge sidan sist. Vi køyrde inn til kyrkja som ligg vakkert ved Hornindalsvatnet. På vegen oppover køyrde vi forbi Lindvika der tante Nanny i Remmedalen vaks opp, ingen igjen der, og garden er seld som tilleggsjord til nabobruket, men stova og låven står framleis. Eit stykkje oppe i Åsebøstøbakkane ligg Flatene.Oldemor mi, Ingeborg Knutsdotter Åsebøstø, vaks opp her. Oldefaren min, Ola Pederson Åsebø var frå sjølve Åsebøen, når ein kjem opp på høgda. Dei flytta til Remmedalen og kjøpte seg gard der. Sonen, Peder overtok garden i 1916 og han var far til mi mor. Sikkert mykje interessant historie der viss ein vil granske på det - kanskje ei oppgåve for Besten til vinteren?

onsdag 13. august 2008

Kaninene til Kristine

Denne veka er Kristine og familien hennar på Kreta. Fleire tanter/onklar og syskjenborn reiser i lag, så dei har det triveleg. Dei er heldige med veret, så det blir mykje bading.
Vi passar kaninene som er heime på Golvsengane. Det blir ein tur morgon og kveld for å late dei ut og inn av soveburet + foring.

lørdag 9. august 2008

Fjorden rundt






I dag tidleg kom Lappetausa med nattbussen frå Gardermoen/Spania. Etter frokost, køyrde vi henne inn att i Gloppen der gubben og minstejenta venta med ryddig og varmt hus.
Besten og eg hadde planlagt at vi skulle nytte høvet og ta turen rundt innfjorden, lenge sidan sist vi køyrde Utvikfjellet. Vi var innom kyrkjegarden i Innvik der Besten har mange slektningar gravlagde. Vi var også opp til den gamle ullvarefabrikken der onkel Mathias var vaktmeister i ein mannsalder. Farmor Amanda jobba der også då ho var ung. I Olden låg det eit stort og flott turistskip ved kai og mange turistar var ute og spaserte i sentrum. I Stryn tok vi turen opp i Kreklingen og besøkte syskjenbarnet til Besten. Der vart det både middag, dessert og kaffi og vi hadde ei triveleg stund. Dei har ein stor flott hage med mange stauder/plantar. Fint ver på heile turen - ein triveleg dag.

torsdag 7. august 2008

Gratulerer med dagen Ole Kristian!

I dag fyller "Os-bonden" og vårt nest eldste barnebarn 20 år. Bildet er 4 år gamalt, og viser ein omsorgsfull storebror. Vi er alle ein stor beundrar av han. Lukke til vidare OK!

onsdag 6. august 2008

Onsdagstur


I dag var det meininga at Veteranklubben skulle køyre Panoramavegen. Sjukdom m.m gjorde at denne turen vart avlyst, men eit par veteranbilar hadde lyst på tur, så då vart det Bjørkedalen i staden. Vi kjøpte oss kaffi og vafler på camping-plassen og hadde ei triveleg stund.