Greinkutter og lester

Besten, og til dels eg, har jobba litt ute tidleg på dag, men no regnar det trollkjerringar igjen. Tre av naboane våre har skifta tak på husa sine i haust. Det har nok vore ein tøff jobb med regn, litt kulde, sleipt og glatt, men det har heldigvis gått bra, og den siste ser ut til å bli ferdig i dag. Besten kosar seg med kompostkverna under tak i hagestova, som no er rydda til arbeidsstove for vinteren. I og med at vi har fleire frukttre og 2 hekkar i hagen, har vi i fleire år tenkt å kjøpe slik kvern. No var det eit godt tilbod på Biltema, kr 1.999,-, så vi sukka til. 1. advent i går, så vi må vel byrja å vente snø. I ledige stunder har eg bl.a. strikka på eit lestepar til ein vaksen kar som treng å halde seg varm på føttene. Kjekt og enkelt å strikke striper, slepp telling og målband.

Snartur til Bergen

Onsdag-torsdag var vi ein snartur til Bergen. Vi parkerte i By-garasjen og hadde kort veg bort til hotell Grand Terminus, bestilt via hotell.no. Vi fekk eit stort, flott rom i gamal stil med utsikt mot jernbanestasjonen til kr 1.232,-. Stort flott bad med badekar var der også, så det var berre å kose seg. Grand Terminus er eit gamalt ærverdig hotell frå 1928 som er tatt godt vare på. Eg har budd der nokre gonger på 70-80-90-tallet når eg var på møte/kurs i DNB. Vi fekk treffe barnebarnet vårt, Stig og kjærasten Renate, som begge studerer i Bergen. Dei hadde ikkje høve til å kome heim og feire 70-årsdagen til Besten i oktober, så vi tok ei attepå feiring i lag med dei på EGON Kjøttbasarene, ein kjempetøff restaurant/pub som berre må opplevast. Veret var dårleg, men det var kjekt med ein tur før vinteren set inn for fullt. Godt å vere vel heime før stormen Berit byrja å herje som verst.

Teater-oppleving

Undset Søndag 20. november kl 19.00

”En stor prestasjon. En sjelden opplevelse. En vakker forestilling.” Pressa jubla, turneen var utseld, og Nationaltheatret blei fylt til randen. Ellen Horn si framstilling av Sigrid Undset blei ein suksess. Publikum fekk ikkje nok, dei ville sjå framsyninga på nytt. Etter eit utal oppmodingar har Ellen Horn difor sagt ja til ein ny turné. Du kan glede deg! Året er 1945. Undset kjem heim frå USA. Norge er i fredsrus, men Sigrid er sliten. Ho har opplevd dramatiske år som flyktning og mista to av borna sine. Tyskarane har rasert heimen hennar, og ho veit ikkje om ho skal pakke ut. UNDSET er ei scenisk og visuell framstilling av dei viktigaste hendingane i Sigrid Undset sitt liv med musikk av Ketil Bjørnstad. Framsyninga er til no sett av 40 000 publikummarar. ”Formidabelt” Dagbladet ”Glimrende” Aftenposten ”Imponerende” VG ”En kraftprestasjon” Adresseavisen ”Denne forestillingen bør man ikke gå glipp av!” GD Med Ellen Horn. UNDSET hadde urpremiere i 2002. Av Otto Homlung og Tine Thomassen. Regi: Otto Homlung. Scenografi/ kostymedesign: Bård Thorbjørnsen. Musikk: Ketil Bjørnstad. Lysdesign Espen Solum. Produksjon av projeksjoner Knut Solhaug. Maskedesign Helge Bjørnå. XXXXXXXXXXXXXXXXXXXXX Kommentar frå Eidabesta: Riksteateret med Ellen Horn som Sigrid Undset i Operahuset i kveld, ei fantastisk forestilling. Eg var i koseleg selskap med Hilde og Signe.

Nyinvestering

Besten har lenge hatt bruk for eit nytt fiskehjul til båten sin, så pengegåver til 70-årsdagen vart sett av til dette formålet. Han har leita i butikkar og på internett etter fiskehjul til god kvalitet/pris, og kom til at Agdars Sportsfiske i Trondheim hadde beste tilbodet. Ula Fiskehjul ligg også ute på Finn.no, kr 2.190,- + frakt, totalt 2.289,-. I dag var han på postkontoret og henta pakken. Med ny båtkalesje og nytt fiskehjul er det vel håp om at det kan vanke litt fersk fisk av og til. Er det ikkje noko som heiter at "det er håp i hengande snøre"?

Vakkert haustvér

Når vi passer Mira blir det ofte til at eg går ein luftetur med henne, gjerne om Stadion/Øyane/Malakoff/Småbåthamna, der er det fredeleg og lite trafikk. Etter å ha steikt seikaker av resten av fisken frå forrige leveranse frå vår kjære svoger i Ørsta (har fått ny leveranse!), gjekk vi den vanlege ruta i nydeleg haustver. Sola er vekk på denne sida av dalen, burde sjølvsagt tatt turen opp i Myklebuståsen, men det får vi ta ein dag Besten kan vere med. Han likar å få fred å jobbe med veteran-prosjektet sitt i garasjen. Kjekt å kome heim til ferdig middag og ei god kvild på sofaen med lydbok etterpå.

Laurdags-tur til Innvik

Geilemyrane
Heggdal-støylen
Utsikt ned til Innvik og over fjorden til Røberg
Liatunet

Svein har lenge hatt lyst på ein "guida" tur til Innvik, så Lise og Kjell inviterte oss med på tur i dag - som ei "avslutning" på 70-års feiringa hans. Vi køyrde først opp til Liatunet, ein gamal gard med fleire restaurerte bygningar som er overtatt av Stryn kommune. I sommar-halvåret er det fleire aktivitetar/arrangement på denne garden, og ein kan leige huset på bildet til selskap etc.
Vi køyrde også langt opp i fjellsida på skogsvegen mot Lyslo-støylen. Før i tida var det ein tung og lang sætreveg opp dit. No er det berre eit kort stykkje å gå opp til støylen frå skogsvegen - men den turen får vi ta ein annan gong. Storslått utsikt ned til Innvik-bygda og over fjorden til Øvre (og nedre) Røberg der Mattis Isakson Røberg, oldefaren til Kjell og Svein, kom frå. Vi såg også ut til Heggdal-støylen der mor til Lise var budeie i gamle dagar.
Vegen opp til Geilemyrane er lagt om, og siste stykket er strak og bein. Dei gamle husa hos naboen, "Johansane", er borte, og det er bygt 2 nye hus nedom vegen (ikkje med på bildet). Det gamle bustadhuset til Johannes og Herborg stod omtrent der den raude garasjen til høgre på bildet er no. Hos Marianne og Arild fekk vi nydeleg hjortegryte, kake og kaffi, og det var kjekt å få treffe dei tre aktive døtrene deira, Lene, Heidi og Thea. Takk for ein kjekk dag!

Bursdagsfeiring

Triveleg bursdagsfeiring for Svein i går med søndags-buffet på Nordfjord Hotell og kaffi/kaker heime i Alleen. Jubilanten si næraste familie var samla, 27 med smått og stort. Ei av gåvene var denne fotskammelen med inskripsjon: "på godfot med deg, stig opp på meg". Symbolsk den også?
Takk for alle gåvene, både på dagen den 25. og i går! Eldstejenta av barnebarna, Ingrid, heldt ei morsom tale på vegne av dei 11 barnebarna (7-23 år), noko Besten sette stor pris på.

Bursdagar i oktober

I kveld feira vi Bjørnar sin 16 årsdag. Koseleg som alltid på Os. Svein feira 70 årsdagen sin den 25., og vi gleder oss over at Rasmus fekk feire sin 68-årsdag den 26. Bildet viser ein vakker presang Svein fekk til sin dag. Litt symbolsk.

Ny båtkalesje

Vi skulle ha fått ny kalesje på båten vår for lenge sidan, men det har vore vanskeleg å få firmaet i Måløy (http://www.maloy-industrisom.no/batkalesjer) til å ta oppdraget utan at vi frakta båten ut i flyte-hallen deira, noko vi kvidde oss på. I år lukkast det endeleg å få ein mann til å kome og ta mål inne i båthamna vår, han hadde visst andre oppdrag der også. Mens vi venta på den nye kalesja, hadde Svein festa ei gamal kalesje provisorisk for å halde ute regnet. I går hadde vi oss ein søndagstur nedom båthamna for å sjekke om det var lekasje, og då fekk vi den overaskinga. Kalesja var montert og alt såg bra ut! Flott service og fint arbeid, så no er det berre å vente på rekninga i posten, det blir nok dyrt. Eg har sagt at det får vere 70-års-presangen frå meg. Svein er ingen storfiskar, men han set pris på å ta seg ein tur på sjøen av og til og det blir som oftast ei "koke" eller to når han tek turen. Vi har det trygt, lettvint og fint i småbåthamna, med 2 flytebryggjer og 3 naustrekkjer innafor moloen. Det var eit storarbeid då dei mudra ut for flytebryggja sør for dampskipskaia og vest for meieriet og VS. No er det blitt eit attraktivt fritidsområde ved Os-elva og badestranda utanfor moloen.

Tur i marka

Fin søndagstur til Heida og hytta til Elin og Jostein. Tinka var med dei, og dei hadde overnatta i vakkert haustver. Vakker utsikt frå hytta deira som ligg fritt og fint like nedanfor Heida, som er sætra der mor vår var budeie. Slettebø-selet ligg til venstre i bildet. På heimturen køyrde vi ned om Sjøsætra der eg var "budeie" i lag med mor og Marie Myrstad i gamle dagar. Desse to sætrane ligg ganske nær kvarandre, Heida for Remmedølene og Sjøsætra for Hafsåsarane.

Bursdagsfeiring på Golvsengane

Den nymåla loftsstova vart innvigd med brettspel. Litt nakne veggar endå, men det ordnar seg nok etter kvart.

Kris hjelper onkel Stein med dataproblemer:

Kristine har feira bursdag i 3 dagar, klassekameratar fredag, mor si fam laurdag og far sin fam søndag. Alle dei 11 søskenbarna var samla denne gongen, lenge sidan sist. Stig var heime frå Bergen på langhelg og Kris heime frå Ålesund.

Bursdagar i september

Gratulerer niesa mi, Anna Pernille, med 40-årsdagen i dag! Har funne fram foto av henne som konfirmant, tante (Sara), og brud (2009). Anna Pernille er ei skikkeleg gladjente.
---
Ei anna gladjente er barnebarnet vårt, Kristine. Gratulerer med 11-årsdagen i dag. Ho er m.a. interessert i fotball, handball, turn, kunst og hund (Mira).