20. dag jul

Frå gamalt av vart det sagt noko slikt som: "20 dag jul jagar Knut ut", så i dag (eller i morgon...?) må eg vel pakke vekk juletreet. Det er eit lite plast-tre på 160 cm, men det gjer god nytte for seg, slepp allergi og dryssing av nåler. Stor kontrast til då eg var yngre og tykte at juletreet måtte gå heilt i taket. Av ein eller annan grunn har eg hatt ein viss motvilje mot å "pakke ned jula" i år, tykte jula gjekk så fort, trur det må vere alderen. Ute har det regna i fleire dagar, etter eit lite snøfall i forrige veke. Utriveleg å vere ute, men ein slepp glatte vegar.

Julegåver

Fekk lyst å skrive litt om julegåvene vi fekk i år.

LilleMø og gubben spanderte skotøy. Dock Boots til Besten som han anbefaler på det varmaste.

Av Lappetausa fekk vi ein vakker qvilta juleløpar (90 cm x 37) + ei lita toilettveske.
Sjølvsagt altfor mykje, men kjekt å få for meg som ikkje syr sjølv. Tusen takk!

Kjekt med bøker også, gled meg til å ta fatt. Elles fekk vi dvd-filmar (så gode at dei p.t. er ute til låns), strømper, undertøy, TV-kanne, kortstokk, liten lysestake og diverse godtteri og småting. Artig å få presangar, sjølv for oss godt vaksne, tusen takk, og takk for ei fin jul i lag med familien.

Elles har vi kosa oss med den engelske TV-serien Cranford i jula.

Gratulerer Magnus og godt nytt år til alle!

I dag er Magnus 14 år, ein vakker ung mann, glad i å spele fotball.

Heilt utruleg kor tida har gått, tykkjer ikkje det er lenge sidan vi feira nyttårskvelden her hjå oss. Vi skjøna vel at noko var på gang, for dei to eldre brødrene overnatta her hjå oss, og om

morgonen var gut nr. 3 komen til verda.

Det har vore ein innhaldsrik desember mnd. med mykje sosialt samvær.

Det starta med 60-års dagen den 6. til svigerinna mi på Stårheim med stort selskap, bursdagsfeiring for Roger den 7. og HP på Os den 17., middag på hotellet med Signe og Kåre, julekveld hjå Audny, bryllaupsfest for SK og M på Stårheim, kalkunmiddag hjå SI, minestronesuppe-party hjå Audny, nyttårsmiddag hjå oss +++.

Nyttårskvelden feira vi stille og roleg heime saman med hunden, Viktor, mens dei unge feira bursdagen til Magnus og overgang til nytt år i Kvernhusvegen.

Gratulerer HP med 18-års dagen i går!

I går kveld var det tradisjonell bursdagsfeiring på Os med besteforeldre, tanter/onklar og syskjenborn. Bildet er av ei ung gudmor, LilleMø, og dåpsbarnet. HP er blitt ein høg, sterk, kjekk ung mann med den gode replikken - lik både farfar og morfar. Godt for besteforeldra å få hjelp til tunge tak.

Bursdagsfeiring i Eidsgt.

I og med at vi feira stort i Torvika i går, vart selskapet til Roger utsett til i dag. LilleMø hadde svigerfar på søndagsmiddag og vi andre i familien kom til kaffi. Eg hadde steikt dia-lappar (vi er minst 3 som må vere forsiktige med sukkeret), Strikkemor hadde med sjokoladekake og LM hadde laga kvæfjordkake, brownes og dia-gele. Ei triveleg stund, kjekt så lenge syskjenborna kan vere i lag. Etter kvart vil dei nok reise vekk på skule og jobb, så ein får setje pris på denne tida. Hestejentene var i stallen både før og etter selskapet, men fekk tid til å gje papsen sin ein bursdagklem. Damene i selskapet vart fotografert i den nostalgiske kroken. Søster Mariann var i Stavanger og feira sonen sin 30-års dag.

Gratulerer!

No laurdag feirar svigerinna mi 60-årsdagen sin i Torvika. Bror min har nett fylt 65 år. Vi gled oss til å feire dagen i lag med dei, borna, vennene deira og syskjena mine. Måleriet er ein kopi måla av Besten frå originalmåleriet til Anders Orheim frå 1920-talet.

I morgon feirar også svigersonen vår, Roger, 47 år. Han er gift med eldste døtra vår og dei har 3 store, kjekke born, ein golden retriver + 2 hestar.

Bakedag

Bakedag i går, kransekaker og Ingers rugbrød. Måndag er ein fin bakedag, har som oftast ikkje andre "avtaler" då. Hadde tinging på nokre kransekaker til jul, så det vart 72 ringar, dvs. 4 kaker. Tek gjerne imot tips frå kokkene på Sunnmøre på kva eg skal bruke dei 12 eggeplommene til som eg har frose ned. Har investert i nye former, burde vore gjort for lenge sidan, lettvint med slippbelegg. Dei gamle formene må vere frå 70-talet, hugsar ikkje kor tid eg byrja med kransekakebaking, men konfirmasjonane her starta i 1980. Kakene frys eg ned, då blir dei mjuke og gode å bite i. Før i tida la dei ein brødskalk i kakeboksen for å få dei mjuke. Må vel steike nokre krumkaker også, det er nesten tradisjon i vår familie, etter farmor si tid - ho stod føre julebaksten då ungane var små - SI er alt byrja å snakke "framonde". Kakemenn og slike ting får dei kose seg med å lage i kvar sine heimar, artig for dei minste. Besten er flink å fullføre UFOane sine. Målinga er fin trening for den skada armen, tykkjer han, i og med at han no er slutta med fysioterapi. Godt det går så bra med han, i fjor vinter vart målinga spolert på grunn av at han hadde skada seg.

Advent

I går kveld var eg med LilleMø til lysmesse i kyrkja. Stemningsfull og fin stund. Konfirmantane deltok aktivt i gudstenesta med prosesjon, levande lys og tekstlesing. Eldstejenta til LM og fetteren frå Myklebuståsen, deltok i tekstlesinga saman med fleire andre konfirmantar.

Laurdag ettermiddag hadde vi uventa besøk av Lappetausa med familie. Ho hadde med ferdig middag, svineribbe med tilbehør. Dei skulle til Måløy der eldstejenta er, men fekk trøbbel med bilen, så dei møttest her i staden. Koseleg. Begge jentene hennar er vekke på skule dette året, så det var artig å treffe dei igjen. Vi fekk også middag, uventa og godt, for eg hadde tenkt å lage laurdags-graut. Strikkemor og -far med dei to minste kom til kaffi, så det vart litt sying, strikking, latter og prating utover kvelden. Mange var innom oss på laurdag, fyrst LM og hennar firbeinte venn, Viktor, så ein veteran-venn av Besten om nyleg er hjarteoperert, så SI, M og K frå Golvsengane. Søndagen var ein heller roleg dag, berre ein liten trimtur med broddar.

I dag blir det kransekake-baking i stor stil på meg, har lova bort eit par kaker til jul. Mandagane er Besten på jobb, så det høver godt. God veke!

Vinter

I dag vakna vi av snøplogen som fylte innkøyrsla vår med hardpakka snø. I og med at vi og dei fleste eigedomane har gjerde mot vegen, og vi har ei ganske breid innkøyrsle, er vi plaga med dette. Vi måtte til med handemakt for å få vekk snøen, snøfresaren klarte ikkje denne utfordringa, der snøen ligg laus, funka fresaren fint, men dette vart for tøft. Kjekt med snøfresar, men ein bør køyre den etter kvart som snøen kjem, og det kan no bli nokre turar for dag viss det snør jamnt. Av ymse grunnar vart ikkje dette gjort denne gongen og det straffa seg. Fint å vere ute i dag, fekk trimme for fleire dagar. I mørkninga var eg ute i hagen med vesleguten og veslejenta og laga snøhole. No har vi veslejenta på overnatting og det har roa seg i leiren. TV-kvelden startar med "Kvitt eller dobbelt" og "Hjarte på rette staden". God helg!

Nyinvestering

I dag monterte Ole Ivar Brekke i Brekke Energi og Kraft varmepumpe i "spisestova" vår. Han er kjend for å vere flink, har aner frå Heggjabygda! Det skal bli godt å få litt stabil varme i huset og heller spe på med vedfyring når det trengs. I og med at det er oppvarming vi treng varmepumpa til, anbefalte han oss å montere den lavt, ho vart derfor plassert under vinduet. Vi kan regulere varmen til TV-stova og kjøkkenet ved å ha åpne eller stengde glassdører.

Hyttetur

I dag hadde vi oss ein fin tur ut til havet, hadde sjekka véret på yr.no. Tok ferga over til Isane i ti-tida. Det vart berre finare og mildare til lenger utover vi kom, vakker sol og roleg hav. Alt stod bra til med hytta trass i sterk storm, regn og kulde i okt. Vi snakka litt med Bjarne som fortalde at det hadde vore eit fæla vér. Var ein tur i Kalvågen og kjøpte frossen lettsalta torsk i 5 kg kartongar til frysaren, billegare enn i fiskedisken på Mega og god kvalitet.
Hadde oss eit herremåltid då vi kom heim att. Bildet viser frostskodda i Isefjorden med Gjegnen i bakgrunnen, teke med mobilkamera gjennom bilvindauget då vi kom innom Kjølsdalen. Uff og uff! Eg gløymde sjølvsagt kameraet denne gongen også - får skulde på alderen.

November

I dag er det fint haustver etter mykje regn, vind og kulde i fleire veker. I forrige veke rydda vi litt i hagen og dekka til rosene. Fire roseknoppar såg ut til å ha overlevd kulden, så eg tok dei inn. Er spent på om dei vil folde seg meir ut enn vist på bildet. Besten tok seg ein tur på sjøen i dag og eg puslar litt i huset. Eg skal ha to "nattevakter" hjå veslejenta - far har tre nattevakter på rad og mor har innspurten (siste veka) i Førde. Start på garasjebygginga hjå sonen i går, ikkje lenge gjort å få støypt grunnmuren for fagfolk. Dagane fyk av garde, sjølv for pensjonistar, men aktiviteten er heller ikkje så stor som hjå den yngre generasjonen. Ynskjer alle ei god veke.